ജപം നിങ്ങളുടെ അഹംഭാവത്തെ കുറച്ചോ? -- മാതാ അമൃതാനന്ദമയി

 

ജപം (Japa)

ദൈവിക നാമമോ ശബ്ദമോ (മന്ത്രം) വാക്കുകളിലൂടെയോ മനസ്സിലൂടെയോ ആവർത്തിക്കുന്നതിനെയാണ് ജപം എന്ന് പറയുന്നത്. എല്ലാ ശബ്ദങ്ങളും രൂപങ്ങളും എവിടെ നിന്നാണോ ഉത്ഭവിക്കുന്നത്, ആ ആത്മാവിന്റെ പരമമായ നിശബ്ദതയിലേക്ക് നമ്മെ നയിക്കുക എന്നതാണ് മന്ത്രജപത്തിന്റെ ലക്ഷ്യമെന്ന് അമ്മ പറയുന്നു. കൂടാതെ, ഭൗതികവാദം നിറഞ്ഞ ഇന്നത്തെ കാലഘട്ടത്തിൽ, ആന്തരിക ശുദ്ധീകരണവും ഏകാഗ്രതയും നേടാനുള്ള ഏറ്റവും എളുപ്പവഴിയാണ് മന്ത്രജപം. മനസ്സിന്റെയോ ശരീരത്തിന്റെയോ ശുദ്ധി സംബന്ധിച്ച നിയമങ്ങളൊന്നും നോക്കാതെ എപ്പോൾ വേണമെങ്കിലും എവിടെ വെച്ചും ജപം നടത്താം. ഏത് ജോലിയിൽ ഏർപ്പെട്ടിരിക്കുമ്പോഴും ജപം ചെയ്യാവുന്നതാണ്.

ജപശീലം വളർത്താൻ സഹായിക്കുന്ന പ്രവൃത്തികൾ

ഒരു ആത്മസാക്ഷാത്കാരം സിദ്ധിച്ച ഗുരുവില് (സദ്ഗുരു) നിന്ന് മന്ത്രം സ്വീകരിക്കുന്നതാണ് എപ്പോഴും ഉചിതം. അതുവരെ നമുക്ക് പ്രിയപ്പെട്ട ഇഷ്ടദൈവത്തിന്റെ മന്ത്രങ്ങളായ “ഓം നമഃ ശിവായ”, “ഓം നമോ ഭഗവതേ വാസുദേവായ”, “ഓം നമോ നാരായണായ”, “ഹരേ രാമ ഹരേ രാമ രാമ രാമ ഹരേ ഹരേ, ഹരേ കൃഷ്ണ ഹരേ കൃഷ്ണ കൃഷ്ണ കൃഷ്ണ ഹരേ ഹരേ”, “ഹരി ഓം”, “ഓം പരാശക്ത്യൈ നമഃ”, “ഓം ശിവശക്ത്യൈക്യ രൂപിണ്യൈ നമഃ” എന്നിവയോ അല്ലെങ്കിൽ ക്രിസ്തുവിന്റെയോ അള്ളാഹുവിന്റെയോ ബുദ്ധന്റെയോ നാമങ്ങളോ ഉപയോഗിക്കാം. ദിവസവും നിശ്ചിത തവണ മന്ത്രം ജപിക്കുമെന്ന് തീരുമാനിക്കുന്നത് ജപശീലം വളർത്താൻ സഹായിക്കും.

ജപം ചെയ്യുന്നതിനായി നാം എപ്പോഴും ഒരു ജപമാല കൈവശം വെക്കണം. 108, 54, 27 അല്ലെങ്കിൽ 18 മണികളുള്ള രുദ്രാക്ഷം, തുളസി, സ്ഫടികം, ചന്ദനം, രത്നങ്ങൾ തുടങ്ങിയവ കൊണ്ടുള്ള മാലകൾ ഉപയോഗിക്കാം, ഇതിൽ ഒരു ഗുരുമണി (പ്രധാന മണി) ഉണ്ടായിരിക്കണം. ദിവസവും നിശ്ചിത എണ്ണം മാല ജപിക്കുമെന്ന് നാം ഉറപ്പിക്കണം. മക്കളേ, നടക്കുമ്പോഴോ യാത്ര ചെയ്യുമ്പോഴോ ജോലി ചെയ്യുമ്പോഴോ ഒക്കെ നാം എപ്പോഴും മനസ്സിൽ മന്ത്രം ജപിച്ചു കൊണ്ടിരിക്കണം.

ആവർത്തനത്തിന്റെ പ്രാധാന്യം

ഒരു നിമിഷം പോലും മന്ത്രജപത്തിൽ ഇടവേള വരാതിരിക്കാൻ ശ്രമിക്കുക. ഏത് ജോലിയിൽ ഏർപ്പെട്ടിരിക്കുമ്പോഴും മന്ത്രം ആവർത്തിച്ചു കൊണ്ടിരിക്കുക. മനസ്സിൽ ജപിക്കുന്നത് തുടക്കത്തിൽ എല്ലായ്‌പ്പോഴും സാധ്യമായെന്നു വരില്ല, അതിനാൽ ആരംഭത്തിൽ, വെള്ളം കുടിക്കുന്ന മീനിനെപ്പോലെ ചുണ്ടുകൾ അനവരതം ചലിപ്പിച്ചുകൊണ്ട് ജപം പരിശീലിക്കുക. ജപം നിലനിർത്തുകയാണെങ്കിൽ, ജോലിക്കിടയിൽ അനാവശ്യ സംസാരം സാധ്യമാകില്ല. മനസ്സ് എപ്പോഴും ശാന്തമായിരിക്കും. ഇന്നത്തെ കാലത്തെ രോഗങ്ങളിൽ ഭൂരിഭാഗവും മനോശാരീരികമാണ് (psychosomatic). ജപം മനസ്സിനും ശരീരത്തിനും നല്ല ആരോഗ്യം പ്രധാനം ചെയ്യും.

ഒരു പ്രത്യേക ജോലിക്കിടയിൽ ജപിക്കാൻ സാധിക്കുന്നില്ലെങ്കിൽ, അത് തുടങ്ങുന്നതിന് മുമ്പ് പ്രാർത്ഥിക്കുക: "ഭഗവാനേ, അങ്ങയെ പ്രസാദിപ്പിക്കുന്ന രീതിയിൽ ഈ ജോലി ചെയ്യാൻ എനിക്ക് അങ്ങയുടെ അനുഗ്രഹം നൽകിയാലും!" ജോലിക്ക് ശേഷം, അറിഞ്ഞോ അറിയാതെയോ ആ ജോലിക്കിടയിൽ സംഭവിച്ചിട്ടുള്ള തെറ്റുകൾ പൊറുക്കുന്നതിനായി ഭഗവാനോട് വീണ്ടും പ്രാർത്ഥിക്കുക.

ഈശ്വരനാമത്തിന്റെ നിരന്തരമായ ആവർത്തനം അഹംഭാവത്തെ കുറയ്ക്കും

“ഞാൻ ഒരു പ്രധാനപ്പെട്ട വ്യക്തിയാണ്; എനിക്ക് സമൂഹത്തിൽ ഉയർന്ന സ്ഥാനമുണ്ട്. അവിടുത്തെ തിക്കിലും തിരക്കിലും പെട്ട് എനിക്കെങ്ങനെ ക്ഷേത്രത്തിൽ പോയി ആരാധിക്കാൻ കഴിയും? ഞാൻ എങ്ങനെ ഭഗവാന്റെ മുന്നിൽ കുമ്പിടും? അത് അഭിമാനക്ഷതമല്ലേ?” ഇങ്ങനെയുള്ള ചിന്തകൾ അഹംഭാവത്തിൽ നിന്നാണ് ഉണ്ടാകുന്നത്. എപ്പോഴും എവിടെ വെച്ചും ഭഗവാന്റെ നാമം ജപിക്കാനും ഭഗവാനെയും ഗുരുവിനെയും വന്ദിക്കാനും തയ്യാറായിരിക്കുക. സമൂഹത്തിൽ നിന്നുള്ള മഹത്വത്തിന്റെ സർട്ടിഫിക്കറ്റ് കൊണ്ട് നമുക്ക് ഒന്നും ലഭിക്കാനില്ല; നമുക്ക് വേണ്ടത് ദൈവത്തിൽ നിന്നുള്ള സർട്ടിഫിക്കറ്റാണ്. നിരന്തരമായ പരിശ്രമത്തിലൂടെ, ഏത് തരം ജോലി ചെയ്യുമ്പോഴും മനസ്സിൽ മന്ത്രം ആവർത്തിക്കാൻ നമുക്ക് സാധിക്കും.

ഒരു സെക്കൻഡ് പോലും ദൈവത്തെ മറക്കരുത്

യാത്രയ്ക്കിടയിൽ പണം നഷ്ടപ്പെട്ടാൽ നാം എത്ര പരിഭ്രമിച്ചാണ് അത് തിരയുന്നത് എന്ന് ചിന്തിക്കുക! അതുപോലെ, ഒരു ചെറിയ നിമിഷം പോലും ജപം ചെയ്യാൻ സാധിച്ചില്ലെങ്കിൽ നാം ദുഃഖിക്കണം: “കഷ്ടം, ഭഗവാനേ, എനിക്ക് ഇത്രയും സമയം നഷ്ടമായല്ലോ!” അങ്ങനെയൊരു മനോവിഷമം ഉണ്ടെങ്കിൽ ഉറങ്ങുന്ന സമയം പോലും പാഴാവുകയില്ല. മക്കളേ, പത്തു ലക്ഷം ഡോളർ നഷ്ടപ്പെട്ടാൽ പോലും നമുക്കത് തിരിച്ചുപിടിക്കാം. എന്നാൽ ഒരു സെക്കൻഡ് നഷ്ടപ്പെട്ടാൽ അത് നമുക്ക് തിരികെ ലഭിക്കില്ല. ദൈവത്തെ ഓർക്കാത്ത ഓരോ നിമിഷവും നമുക്ക് നഷ്ടപ്പെട്ടതാണ്. ജപം മറ്റ് ചിന്തകളെ മാറ്റി ആ പ്രത്യേക മന്ത്രത്തെ അവിടെ പ്രതിഷ്ഠിക്കുന്നു.

ഉപ്പുവെള്ളത്തിലേക്ക് ശുദ്ധജലം തുടർച്ചയായി ചേർത്താൽ ഉപ്പുരസം കുറഞ്ഞു വരുന്നതുപോലെ, മന്ത്രത്തിന്റെ നിരന്തരമായ ആവർത്തനത്തിലൂടെ ചിന്തകളുടെ എണ്ണം കുറയ്ക്കാൻ സാധിക്കും. കാലക്രമേണ, ദൈവം എന്ന ഒരൊറ്റ ചിന്തയൊഴികെ മറ്റെല്ലാ ചിന്തകളെയും ഇല്ലാതാക്കാൻ കഴിയും. ലക്ഷ്യത്തിലെത്താനുള്ള പൂർണ്ണമായ വിശ്വാസവും നിശ്ചയദാർഢ്യവും ഉണ്ടെങ്കിൽ ജപത്തിലൂടെ സ്നേഹം ഉറവെടുക്കും. ഈ തത്വത്തെ ശരിയായ ധാരണയോടെ ഉൾക്കൊണ്ട് ചെയ്യുന്ന മന്ത്രജപം ആത്യന്തികമായി നമ്മെ സ്രോതസ്സിലേക്ക് (Source) എത്തിക്കും. ഈ ഘട്ടത്തിൽ, താൻ ധ്യാനിച്ചുകൊണ്ടിരുന്ന രൂപവും തനിക്കുള്ളിലുള്ള മറ്റെല്ലാ രൂപങ്ങളും ആത്മാവിന്റെ തന്നെ പ്രഭാവങ്ങളാണെന്ന് സാധകൻ തിരിച്ചറിയുന്നു.

ദിവസവും മന്ത്രം എഴുതുക

ദിവസവും കുറഞ്ഞത് ഒരു പേജ് മന്ത്രം എഴുതുന്നത് നല്ലൊരു ശീലമാണ്. ജപിക്കുന്നതിനേക്കാൾ എഴുതുന്നതിലൂടെ പലർക്കും മികച്ച ഏകാഗ്രത ലഭിക്കാറുണ്ട്. മന്ത്രം ജപിക്കാനും വൃത്തിയായി എഴുതാനുമുള്ള ശീലം കുട്ടികളിലും വളർത്താൻ ശ്രമിക്കുക. ഇത് അവരുടെ കൈയക്ഷരം മെച്ചപ്പെടുത്താനും സഹായിക്കും. മന്ത്രം എഴുതിയ പുസ്തകം അലക്ഷ്യമായി വലിച്ചെറിയരുത്; അത് നമ്മുടെ ധ്യാനമുറിയിലോ പൂജാമുറിയിലോ സൂക്ഷിച്ചു വെക്കണം.