ഭഗവാൻ ശിവനെ ലിംഗരൂപത്തിൽ പ്രതിനിധീകരിക്കുന്നത് എന്തുകൊണ്ടാണെന്ന് ദയവായി വിശദീകരിക്കാമോ?

 ചോദ്യം: ഗുരുദേവ്, ഭഗവാൻ ശിവൻ കൈലാസ പർവ്വതത്തിൽ ധ്യാനിച്ചിരിക്കുന്നതായും കഴുത്തിൽ ഒരു സർപ്പത്തെ ധരിച്ചതായും ചിത്രീകരിച്ചിരിക്കുന്നത് കാണുമ്പോൾ, ഈ പ്രതീകാത്മകതയുടെ ആത്മീയ അർത്ഥം എന്താണ്? കൂടാതെ, ഭഗവാൻ ശിവനെ ലിംഗരൂപത്തിൽ പ്രതിനിധീകരിക്കുന്നത് എന്തുകൊണ്ടാണെന്ന് ദയവായി വിശദീകരിക്കാമോ?

ശ്രീ ശ്രീ രവിശങ്കർ: ഓരോ പ്രതീകത്തിനും ഓരോ അർത്ഥമുണ്ട്:

1) സർപ്പം
ഒന്നുമില്ലാത്ത, ബോധത്തിന്റെ ആന്തരിക ആകാശം മാത്രമുള്ള സമാധി അവസ്ഥയാണ് ശിവൻ; അവിടെ ജാഗ്രതയുണ്ട്, എന്നാൽ പ്രവൃത്തിയില്ല. ഈ ജാഗ്രതയെ വിവരിക്കാനാണ് ശിവന്റെ കഴുത്തിൽ പാമ്പിനെ അണിയിച്ചിരിക്കുന്നത്. അതിനാൽ സർപ്പം ജാഗ്രതയുടെ പ്രതീകമാണ്. ധ്യാനാവസ്ഥയിൽ, കണ്ണുകൾ അടഞ്ഞിരിക്കുമ്പോൾ, ആ വ്യക്തി ഉറങ്ങുകയാണെന്ന് തോന്നിപ്പിക്കാം, പക്ഷേ അദ്ദേഹം ഉറക്കത്തിലല്ല, മറിച്ച് ജാഗരൂകനാണ്. ബോധത്തിന്റെ ഈ അവസ്ഥയെ പ്രകടിപ്പിക്കാനാണ് ശിവന്റെ കഴുത്തിൽ പാമ്പിനെ കാണിക്കുന്നത്.

2) ശിവലിംഗം
ലിംഗം എന്നാൽ തിരിച്ചറിയൽ എന്നാണ് അർത്ഥം, സത്യമെന്താണെന്നും യാഥാർത്ഥ്യമെന്താണെന്നും തിരിച്ചറിയാൻ കഴിയുന്ന ഒരു പ്രതീകം. ദൃശ്യമല്ലാത്ത ഒന്ന് എന്നാൽ ഒരു കാര്യത്തിലൂടെ തിരിച്ചറിയാൻ കഴിയുന്നത് ഏതാണോ അതാണ് ലിംഗം.

ഒരു കുഞ്ഞ് ജനിക്കുമ്പോൾ അതിന്റെ ലിംഗഭേദം നിങ്ങൾ എങ്ങനെ അറിയും? ശരീരത്തിന്റെ ഒരു ഭാഗത്തിലൂടെ മാത്രമേ ആ കുഞ്ഞ് ആൺകുട്ടിയാണോ പെൺകുട്ടിയാണോ എന്ന് നിങ്ങൾക്ക് തിരിച്ചറിയാൻ കഴിയൂ. അതുകൊണ്ടാണ് ജനനേന്ദ്രിയത്തെ ലിംഗം എന്നും വിളിക്കുന്നത്.

സൃഷ്ടികർത്താവിനെ നിങ്ങൾ എങ്ങനെ തിരിച്ചറിയും? അവിടുത്തെക്ക് രൂപമില്ല! അതിനാൽ, അവിടുത്തെ തിരിച്ചറിയാൻ ഒരു അടയാളം വേണമെന്ന് അവർ പറഞ്ഞു. അങ്ങനെ, രൂപമോ അടയാളമോ ഇല്ലാത്ത, ഈ പ്രപഞ്ചത്തിൽ (ബ്രഹ്മാണ്ഡത്തിൽ) മുഴുവൻ നിറഞ്ഞുനിൽക്കുന്ന ഭഗവാനെ തിരിച്ചറിയുന്നതിനായി പുരുഷ രൂപത്തെയും സ്ത്രീ രൂപത്തെയും സംയോജിപ്പിച്ച് നിർമ്മിച്ച ഏക പ്രതീകമാണ് ശിവലിംഗം.

ശിവലിംഗം പുരാതനമാണ്. ശിവലിംഗത്തിലൂടെ നിങ്ങൾ രൂപത്തിൽ നിന്ന് അരൂപത്തിലേക്ക് (രൂപമില്ലാത്ത അവസ്ഥയിലേക്ക്) പോകുന്നു. പ്രപഞ്ചത്തെയും പ്രപഞ്ചസൃഷ്ടാവിനെയും ഒന്നായി പ്രതിനിധീകരിക്കുന്ന പ്രതീകമാണിത്. ഇത് സൃഷ്ടിയിലെ രണ്ട് തത്വങ്ങളായ ശിവനും ശക്തിയുമാണ്. നിശബ്ദമായ അവ്യക്തതയും ചലനാത്മകമായ പ്രകടനവും ഒത്തുചേരുന്നതാണ് ശിവലിംഗമായി പ്രതിനിധീകരിക്കുന്നത്; ഇത് വെറും ശിവൻ മാത്രമല്ല, പരമോന്നത ബോധത്തിന്റെ പൂർണ്ണതയാണ്.

3) കൈലാസ പർവ്വതം
ശിവന്റെ വാസസ്ഥലം കൈലാസ പർവ്വതത്തിലും സ്മശാനത്തിലുമാണ്. കൈലാസം എന്നാൽ 'ആഘോഷം മാത്രം ഉള്ളിടം' എന്നും, സ്മശാനം എന്നാൽ 'ശൂന്യത മാത്രം ഉള്ളിടം' എന്നുമാണ് അർത്ഥം. ദൈവികത ശൂന്യതയിലും ആഘോഷത്തിലും വസിക്കുന്നു. നിങ്ങളിലും ശൂന്യതയുണ്ട്, നിങ്ങളിലും ആഘോഷമുണ്ട്.