ധ്യാനം ലളിതമാണ് --- ഓഷോ

 ഓഷോ, ധ്യാനം എന്നത് വളരെ ലളിതമായ ഒന്നാണെന്നാണ് ഞാൻ കരുതിയിരുന്നത്. എന്നാൽ വിപാസന ചെയ്യുന്ന ആളുകളെ കാണുമ്പോൾ, ഒരു വിജയകരമായ ധ്യാനിയാകാൻ എനിക്ക് സാധിക്കുമെന്ന പ്രതീക്ഷ എനിക്ക് നഷ്ടപ്പെടുകയാണ്. ദയവായി എനിക്കല്പം പ്രോത്സാഹനം നൽകിയാലും.

പോൾ, ധ്യാനം ലളിതമാണ്. അത് ലളിതമാണ് എന്നതുകൊണ്ട് തന്നെയാണ് അത് പ്രയാസകരമായി തോന്നുന്നത്. നിന്റെ മനസ്സ് സങ്കീർണ്ണമായ പ്രശ്നങ്ങൾ കൈകാര്യം ചെയ്ത് ശീലിച്ചതാണ്; ജീവിതത്തിലെ ലളിതമായ കാര്യങ്ങളോട് പ്രതികരിക്കുന്നത് എങ്ങനെയെന്ന് അത് പൂർണ്ണമായും മറന്നുപോയിരിക്കുന്നു. ഒരു കാര്യം എത്രത്തോളം ലളിതമാണോ, അത്രത്തോളം അത് മനസ്സിന് പ്രയാസകരമായി തോന്നും. കാരണം സങ്കീർണ്ണമായ കാര്യങ്ങൾ പരിഹരിക്കുന്നതിൽ മനസ്സ് വളരെ കാര്യക്ഷമമാണ്. പ്രയാസകരമായ കാര്യങ്ങൾ പരിഹരിക്കാനാണ് അതിന് പരിശീലനം ലഭിച്ചിരിക്കുന്നത്, ലളിതമായവയെ എങ്ങനെ നേരിടണമെന്ന് അതിനറിയില്ല. ധ്യാനം ലളിതമാണ്, നിന്റെ മനസ്സ് സങ്കീർണ്ണമാണ്. ധ്യാനമല്ല പ്രശ്നങ്ങൾ ഉണ്ടാക്കുന്നത്. ആ പ്രശ്നം വരുന്നത് നിന്റെ മനസ്സിൽ നിന്നാണ്, ധ്യാനത്തിൽ നിന്നല്ല.

ലോകത്തിലെ ഏറ്റവും ലളിതമായ ധ്യാനമുറയാണ് വിപാസന. വിപാസനയിലൂടെയാണ് ബുദ്ധൻ ബോധോദയം പ്രാപിച്ചത്. മറ്റേതൊരു മാർഗ്ഗത്തേക്കാളും കൂടുതൽ ആളുകൾക്ക് ബോധോദയം ലഭിച്ചതും വിപാസനയിലൂടെയാണ്. വിപാസന ആണ് ആ മാർഗ്ഗം. അതെ, മറ്റ് മാർഗ്ഗങ്ങളുമുണ്ട്, എന്നാൽ അവ വളരെ കുറച്ച് ആളുകളെ മാത്രമേ സഹായിച്ചിട്ടുള്ളൂ. വിപാസന ആയിരക്കണക്കിന് ആളുകളെ സഹായിച്ചിട്ടുണ്ട്, അത് ശരിക്കും വളരെ ലളിതവുമാണ്; യോഗയെപ്പോലെയല്ല അത്. യോഗ പ്രയാസകരമാണ്, കഠിനമാണ്, സങ്കീർണ്ണമാണ്. പല രീതിയിൽ നീ നിന്നെത്തന്നെ പീഡിപ്പിക്കേണ്ടി വരും: ശരീരത്തെ വളച്ചും ഒടിച്ചും, അങ്ങനെയും ഇങ്ങനെയുമൊക്കെ ഇരുന്നും, തലകുത്തി നിന്നും... വ്യായാമങ്ങൾ മാത്രമാണത്. എങ്കിലും യോഗ ആളുകളെ വളരെയധികം ആകർഷിക്കുന്നു.

വിപാസന അത്രമേൽ ലളിതമായതുകൊണ്ട് നീ അതിനെ ശ്രദ്ധിക്കുക പോലും ചെയ്യുന്നില്ല. സത്യത്തിൽ, ആദ്യമായി വിപാസനയെ പരിചയപ്പെടുമ്പോൾ, ഇതിനെ ഒരു ധ്യാനം എന്ന് വിളിക്കാൻ പറ്റുമോ എന്ന് പോലും ഒരാൾ സംശയിച്ചേക്കാം. എന്താണിതിൽ ഉള്ളത്? ശാരീരിക വ്യായാമങ്ങളില്ല, ശ്വസന വ്യായാമങ്ങളില്ല; വളരെ ലളിതമായ ഒരു പ്രതിഭാസം: ശ്വാസം അകത്തേക്ക് വരുന്നതും പുറത്തേക്ക് പോകുന്നതും വെറുതെ നിരീക്ഷിക്കുക... തീർന്നു, ഇതാണ് വിദ്യ; നിശബ്ദമായി ഇരിക്കുക, ശ്വാസം വരുന്നത് നോക്കുക, പോകുന്നത് നോക്കുക; ആ ശ്രദ്ധ തെറ്റാതിരിക്കുക, അത്രമാത്രം. നിന്റെ ശ്വാസം മാറ്റണമെന്നില്ല — ഇത് പ്രാണായാമം അല്ല; ആഴത്തിൽ ശ്വാസമെടുക്കാനോ പുറത്തുവിടാനോ ഉള്ള ഒരു ശ്വസന വ്യായാമവുമല്ല ഇത്. ശ്വസനം എങ്ങനെയുണ്ടോ, അതുപോലെ തന്നെ ലളിതമായി തുടരട്ടെ. നീ അതിലേക്ക് ഒരു പുതിയ ഗുണം കൂടി ചേർത്താൽ മതി: ബോധം (Awareness).